CEBU, Philippines – Ang tadhan nga Cebuana junior cyclist nga si Ana Patricia "Ica" Maximo sa Fizik-Santini mipakugang sa mga lalaki niyang mga kontra human mitapos sa ikaduhang dapit sa Bike for Hope Challenge, usa ka 47 ka kilometro nga road cycling race gikan sa Liloan ngadto sa Barangay Lugo lungsod sa Borbon amihanang bahin sa Sugbu niadtong Sabado.
Ang 16-anyos nga si Maximo maoy bugtong babayeng partisipante sa men's golden category. Ang two-time Sportswriters Association of Cebu (SAC) awardee ug Grade 10 student sa Sacred Heart School- Hijas de Jesus mitapos sa maong makutas nga karera sud sa usa ka oras, 43 minutos ug 42 segundos.
Ang Batang Pinoy national champion maoy naglabaw sa dihang mi-atake siya sa katapusang 15 kilometros apan sa kadugayan naapsan kini ni Danny Ermitanio, nga maoy mi-angkon sa unang puwesto sa oras nga 1:38:00.
"It was a good exposure for me racing with men as I prepare for upcoming national races in Manila and Luzon," matud pa ni Maximo, test rider sa YKKBikes.com nga migamit sa rig nga Fenix-Token.
Naglangkob sa top 10 finishers mao sila si Robert Reyes, Jonathan Rabutin, Alfredo Cañete, Lando Medico, Eufroceno Pedrano, Berwin Velayo, Antonio Villahermosa, ug Gregorio Olmilla.
Gipaluyohan sa Cebu MultiSport, ang ikaduhang edisyon sa maong lumba gi-organisa ni Capt. Fernando de Rojo ug Blessed Hope Christian Fellowship. (BANAT NEWS)