CEBU, Philippines - Mipatigbabaw ang defending champion University of San Carlos (USC) batok sa Don Gerardo Llamera Ouano Memorial National High School (DGLOMNHS) sa gubat tali sa duha ka way pildeng koponan aron pag-angkon og luna sa semifinals sa Central Visayas leg sa Shakey’s Girls Volleyball League Season 13 kagahapon didto sa Cebu City Sports Institute (CCSI) gym sa Barangay San Nicolas.
Bitbit ang 4-0 nga baraha, ang USC spikers segurado na sa semis bisan og unsa pa’y resulta sa katapusan nilang duwa sa eliminasyon batok sa University of Cebu (UC) ubos sa Group A.
Human midaog sa St. Theresa’s College, Pajo National High School ug Paref Southcrest School, ang Carolinians mipakgang sa Don Gerardo, 25-20, 25-14.
Bisan pa sa ilang kapildihan, ang Don Gerardo abante gihapon sa semis human mikulit og 4-1 win-loss record.
Human mahagba sa USC, nakabangon dayon sila pinaagi sa pagmakmak sa Pajo, 25-14, 25-19.
Sa Group B, ang Southwestern University milayat na sab ngadto sa Final Four human gipukan ang Sacred Heart School-Ateneo de Cebu, 25-15, 25-14 alang sa ikatulo nilang sunod-sunod nga daog.
Sa laing bahin, ang crossover semifinals duwaon karong alas -11 sa buntag. Ang sangka sa kampiyonato gikatakda sa alas-3 sa hapon diin ang modaog makaangkon og katungod nga morepresentar sa rehiyon sa Shakey’s GVL League of Champions karong Nobiyembre didto sa Biñan, Laguna. (BANAT NEWS)