Nindot nga silot

Na-ejected man tuod si Janwein Wisdom Ceniza sa University of Southern Philippines Foundation Panthers atol sa ilang duwa batok sa University of San Carlos Warriors diin sila naparot, 64-88, niadtong Domingo didto sa Cebu Coliseum, apan para nako angayan siyang magpasalamat kay bisan og negatibo ang impresyon niini, adunay positibo nga mahitabo kaniya nunot sa iyang nadangatan.

Kini gumikan kay mohimo man siya og kasaysayan sa CESAFI kon Cebu Schools Athletic Foundation, Inc. isip labing unang player sa liga nga mopahigayon og ‘community service’ bugti sa kasaypanan nga iyang nabuhat.

Sa bag-ong lagda man gud sa CESAFI kabahin sa mga magpabadlong nga players, coaches o dili ba kaha team officials, pahimuon sila og upat ka oras nga ‘community service’ isip dugang silot sa naandan na nga usa ka duwa nga suspenso ug P5,000 nga multa.

Kay na ‘thrown out’ man human matawgi og duha ka sunod-sunod nga ‘unsportsmanlike’ fouls nga sulagma ra kaayong mahitabo, si Ceniza obligado nga mopas-an sa maong dugang nga silot.

Kay bisan og makasilbe na siya sa iyang suspensiyon atol sa ilang duwa karong Huwebes batok sa Southwestern University Cobras, dili gihapon siya makabalik og duwa hangtod nga dili siya makapresentar og sertipikasyon gikan sa Cebu City Sports Commission nga nakompleto na niya ang maong ‘community service.’

Samtang sa pagsulat ning lindog, si CSCC chairman Ed Hayco mipadala nato og text message nga nangita pa sila og publikong tunghaan diin si Ceniza mopahigayon sa iyang pagserbisyo sa komunidad pinaagi sa pagtudlo sa iyang nakat-onan sa duwang basketbol ngadto sa mga bata nga nangambisyon sab nga mamahimong bitoon nga atleta sama kaniya.

Tiaw muna, gumikan sa dili maayo niyang  binuhatan sud sa korte, si Ceniza makahimo og kaayohan sa iyang isi’g ka tawo ilabi na ngadto sa mga kabatan-onan.

Sakto si Sir Ed Hayco sa pag-ingon nga dili igo ang upat ka oras alang sa maong mahinungdanong gimbuhaton. Apan ang nakanindot mao ang bulawanong mensahe nga buot ipaambit sa CESAFI paghulma sa maong bag-ong lagda. Nga paamguhon ang sad-an sa sayop niyang binuhatan sa talagsaon nga pamaagi nga makatabang pa ang hintungdan sa uban.

Mao nang dalaygon gyud kaayo ang maong lakang sa CESAFI ubos sa pagpadagan ni commissioner Felix ‘Boy’ O. Tiukinhoy Jr.

Dinhi atong maaninaw ang sanag kaayong pagtulon-an taliwala sa maong simpleng lagda nga para nako usa ka desente ug makiangayon nga pamaagi pagdisiplina sa kun kinsa man ganing sakop niini ang magpabadlong ug mohimo og kalapasan sa mga regulasyon sa liga.

Kun dunay mga komentaryo o reaksiyon, mahimong mo e-mail sa [email protected].