Mga duwa ugma (Cebu Coliseum)
5:15 pm UV vs. DBTC (Jrs.)
6:45 pm SWU vs. USPF (Srs.)
CEBU, Philippines – Nakatilaw na gyud og daog ang Cebu Institute of Technology-University (CIT-U) Wildkittens human ilang na-upset ang kanhi champion Cebu Eastern College Dragons, 67-62 sa 15th Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.
Mibahog og 26 puntos si Jasper Berezo aron pangulohan ang Wildkittens nga nagtabla uban sa Dragons nga parehong nagtangag og 1-2 nga baraha.
Grabe ang paningkamot nga gipakita ni Berezo ilabi na didto sa fourth period diin nahimo siyang sinaligan sa ilang opensa. Hugot sab ang iyang depensa sa ilawom. Gawas sa iyang puntos, si Berezo mihimo sab og upat ka rebounds ug lima ka steals.
Si Mario Abinuman miamot og 15 puntos alang sa Wildkittens nga mao ang kanunay naglabaw gawas lang sa 57-56 sa nahabiling 4:52 sa fourth period human sa basket ni Glent Anfernee Roa.
Kalit kaayong mihuyang ug nabati dayon sa Dragons ang pagkawagtang sa ilang ‘overaged’ player nga si Mark James Roa nga maoy ilang sinaligan sa opensa ug depensa.
Si Roa gi-ban sa tanang sports events sa CESAFI tungod sa iyang pagmaniobra sa NSO diin iyang gipeke ang iyang birth certificate.
Si Roa, dili paryente ni Mark, maoy nangu sa Dragons sa iyang 21 puntos, gisundan ni Garnid Leopoldo sa iyang 12 puntos ug James Tempra nga adunay 10 puntos.
Puntos matag usa
CIT-U (67) – Berezo 26, Abinuman 15, Ares 8, Suson 6, Marata 4, Tabada 4, Tarriman 2, Cabarrubias 2.
CEC (62) – Roa 21, Leopoldo 12, Tempra 10, Galarse 7, Tecson 5, Sullano 4, Orillaneda 2, Tiu. (BANAT NEWS)