CEBU, Philippines – Mibahog og 14 puntos ang rookie nga si Eroll Pastor, samtang pareho nga adunay 11 puntos silang Travis Jelour Mantua ug laing rookie nga si Jed Cedrick Colonia aron baswaton ang defending champion Sacred Heart School-Ateneo de Cebu Magis Eagles ngadto sa 68-55 nga kadaugan batok sa University of Southern Philippines Foundation Baby Panthers sa 15th Cebu Schools Athletic Foundation, Inc. (CESAFI) didto sa Cebu Coliseum kagabii.
Kanunay naglabaw ang Magis Eagles sa maong duwa diin nagmintinar sila’g double figures nga abante sa kinatibuk-ang second half aron moposte sa labing dakung labaw nga 14 puntos, 66-52 sa katapusang dos minutos sa final period.
Bisan og wala kanila ang ila unta nga pambato nga si Joshua Sinclair, wala maglisud ang Magis Eagles, apan dili hinuon sila sama kalig-on sa miaging tuig kay wala na silang Felixberto ‘Janjan’ Jaboneta, Jose Piero Longa, Zach Huang, Joseph Mayol ug Niño Araw-araw.
Ang Baby Panthers kinsa nalupig sa stamina gipangulohan nilang Harvelle Pelegrino ug Ain Obenza nga parehong mipabuhagay og 17 puntos. (BANAT NEWS)