CEBU, Philippines – Gisubhan dayon og daog ang defending champion nga Petron Goldberry (kanhi Goldberry Suites) uban sa laing duha ka teams sa Division A nga mao ang RDAK Stallions ug Filmon Prince Medallion atol sa pagbukas sa ika-20 nga season sa SHAABAA Cup niadtong Domingo didto sa SHS-AdC Canduman Campus gym sa dakbayan sa Mandaue.
Ang Petron Goldberry ni Jeremy Huang midaog sa Cebu Landmasters ni Franco Soberano, 68-63 sa Division A.
Midaog sab ang Filmon Prince Medallion batok sa Chick@Phil Basic, 65-44 ug ang RDAK Stallions ni Reagan King batok sa Bayfront Hotel ni Chase Cokaliong, 67-58.
Silang Leigh Dixon ug Joel Co maoy nangu sa Petron Goldberry sa ilang 13 ug 10 puntos matag usa, samtang si Kyle Valmoria mibahog og 19 puntos alang sa Cebu Landmasters, sila si Christoper Consunji ug Daryle Tan mitampo’g 15 ug 10 puntos matag usa.
Sa sayo pa, tulo ka players sa Filmon Prince Medallion ang miiskor og double figures nga naglakip nilang Kyle Siao sa iyang 17 puntos, Jonathan Cimafranca sa iyang 16 puntos ug Kyle Dy nga adunay 10 puntos. Ang Chick@Phil Basic gipangulohan ni Yosuke Ishikawa sa iyang 14 puntos.
Sa laing bahin, si Arvin Jason Ong miposa’g 22 puntos aron pangulohan ang RDAK Stallions, samtang si Lucky Ecarma miamot og 13 puntos.
Ang Bayfront Hotel gipangulohan nilang Eldie Cabahug ug Raymond Basenio sa ilang 16 ug 13 puntos matag usa.
Sa Division B, ang Caltex Delo gibunyagan sab og daog batok sa Autolab, 74-59.
Silang Chris Aldeguer ug Glenn Sevilla miposa og 17 ug 15 puntos matag usa alang sa Caltex Delo samtang may 13 puntos si Grant Go ug may 12 puntos si Chad Canares.
Bugtong si Serge Goibui lang maoy nakahimo’g double figures sa Autolab sa iyang 11 puntos.
Ang Dynamic Power midaog batok sa White Gold Club, 71-59 ubos sa pagpangulo ni Valiant Ngo sa iyang 17 puntos, samtang si Romeo Alejandro mao sab ang nangu sa White Gold Club nga adunay 20 puntos.
Midaog sab ang RDAK Transport batok sa Filmon Finishing Studio, 66-37.
Silang Christopher Sia ug Mark Tan miposa’g 11 ug 10 puntos alang sa RDAK Transport, samtang si Erickon Atienza adunay 10 puntos alang sa Filmon Finishing Studio. (BANAT NEWS)