May punto si Arum

Bisan nakamugna og negatibong impresyon ang pagpahungaw niya sa publiko sa iyang kasagmuyo batok ni Manny Pacquiao, duna gihapon ko’y nakita nga kaayohan sa gibuhat ni Top Rank chairman Bob Arum.

Human sa iyang promosyon sa miaging semana didto sa Macau, nasuko si Arum sa dihang gipangutana sa usa ka tigbalita kun kanus-a mobalik og away si Pacquiao. Matud pa ni Arum nga alang kaniya, dili na usa ka aktibong boksidor si Pacman ug wala siya masayod kun gusto pa ba nga mokatkat og balik ibabaw sa ring ang iyang boksidor.

Ang gikaulbohan sa kaspa sa beteranong promoter mao ang pagpalta ni Pacquiao sa gikatakda unta niining pagbisita sa iyang doktor aron magiyahan og sakto sa iyang rehabilitasyon. Kahinumduman nga si Pacquiao naoperahan niadtong Mayo 7 didto sa Los Angeles gumikan sa naangol niining tuong abaga nga iyang nahiaguman samtang nangandam sa away nilang Floyd Mayweather, Jr.

Naka-eskidyul si Pacquiao alang sa usa ka follow-up check-up uban sa iyang surgeon nga si Neal El Attrache didto sa Kerlan-Jobe Orthopaedic Clinic sa LA niadtong Hulyo 4, apan iya kining gikanselar. Imbes nga molupad sa Amerika, si Pacquiao mibiyahe hinuon paingon sa Indonesia aron mag-shooting sa usa ka television advertisement ug ingon man pagduaw sa usa ka Pinay nga anaa sa ‘death row’ sa maong nasud, butang nga gikadismaya og maayo ni Arum kay alang kaniya prayoridad unta ni Pacquiao ang kahimtang sa panglawas niini.

Dali hinuon nga nakadepensa si Pacquiao ug miingon nga dili angay nga mabalaka si Arum kay maayo na ang iyang pamatyag ug naghinay-hinay na siya og rehab sa iyang kaugalingon.

Bisan pa man og maayo na ang iyang paminaw, mas angayan gyud unta nga gahinan ni Pacquiao og panahon aron makigkita sa doktor nga mao mismo ang niopera kaniya kay mao kini ang labing nasayod kun unsay angayan niyang sunod buhaton kabahin sa aspetong medikal nga iyang gihambin. Dili tiaw ang nahiaguman nga injury ni Pacquiao ug kinahanglan adto gyud siya mosukna sa usa ka batid kun unsay maayong lakang nga pagabuhaton aron sa hingpit nga pagkaalim sa iyang abilidad nga mahinungdanon kaayo ilabi na kun seryoso siya nga mobalik sa nataran sa pamuksing sunod tuig.

Mao nang nakasabot ko sa sentimento ni Arum. Sa edad nga 83-anyos, nahug nga mura na siya’g usa ka amahan ngadto ni Pacman. Dili ba ang pagsita nimo sa usa ka tawo nga sa imong tan-aw dunay sayop nga nahimo usa man ka timaan sa pagpangga? Kay nagpakabana ka, duna kay pagbati ug pag-amuma nianang tawhana. Nahinumdum nuon ko’s gisulti ni Dr. Isabelo T. Genegabos, ang akong English professor sa dihang nagtungha pa ako sa Cebu Normal University (CNU) nga “We need to be strict in order to be kind.”

Sa tan-aw sa uban posibleng makaaslom sa ilang relasyon ang gibuhat ni Arum, apan para nako makapalig-on pa hinuon kini og samot sa ilang panag-uban nga nasemento nang daan sa mas lisud pang mga hagit ug kalisdanan nga ilang naagian sa milabay’ng mga katuigan.

Alang sa inyong komentaryo o reaksiyon, mahimong mo-email sa [email protected]