Nietes, Donaire daog

QUEZON CITY, Philippines – Ang duha sa labing sikat nga ring superstars nga sila si WBO ug RING light flyweight champion Donnie 'Ahas' Nietes ug former five-division world champion Nonito 'The Filipino Flash' Donaire pulos midemolis sa ilang tagsa-tagsa ka mga Latinong kaatbang atubangan sa mga Filipino fans sa 'Pinoy Pride 30: D-Day' fight card niadtong Sabado sa gabii didto sa makasaysayanong Smart Araneta Coliseum.

Ang two-division world champion nga si Nietes (35-1, 21KOs) mipukan ni Gilberto 'Parrita' Parra (19-3, 17KOs) sa Mexico sa 10th round aron magpabiling Philippines' longest reigning world champ.

Migamit og inutok nga duwa si Parra kinsa nagpunay og tuyok sa ring, apan si Nietes migukod kaniya ug mipatugpa og mga kinumo nga mipaluya ug mipugos sa Mehikano nga suklan siya tunga sa ring.

Nakapabor si Nietes sa iyang mga kusug nga jabs ug uppercuts batok sa Mehikano ug sa ikawalong round, usa ka bangis nga right straight ang mipatumba ni Parra. Nakarekober hinuon ang Mehikano aron mupadayun sa sunod round.

Didto, nakapanimaho na og dugo si Nietes ug subli siyang miatake, ning higayuna nagisian niya si Parra sa tuong kilay. Gikan didto, nagpangupot nalang si Parra aron mulahutay, apan giundang ra gihapon ni referee Jack Reise ang away sa dayung sugod sa 10th round tungod sa paggrabe sa gisi sa kilay sa Mehikano.

"Maayo sad siya pero pasensya lang ko mao to nakuha gyud nako ang knock down," matud pa ni Nietes kinsa sunod mangandam sa laing title defense batok ni Mexican champion Francisco Rodriguez sa Hulyo 4 didto sa Waterfront Cebu City Hotel and Casino.

"Gusto gyud ko nga mokampiyon og dugay," dugang pa ni Nietes kinsa mag-ensayo sa Estados Unidos sugod sa tunga-tungang bahin sa Abril.

Sa iyang bahin, nanginahanglan lang og duha ka rounds si Donaire (35-3, 21KOs) aron paundangon si Brazilian William Prado (22-4, 15KOs) aron maangkon ang bakanteng NABF super bantamweight title.

"He was no joke but with my power and skills, I showed that he was not on my level,"  matud pa ni Donaire kinsa musuway pagsakmit og laing world title sa 122 lbs. division human siya minaug gikan sa featherweight division.

Si Donaire nakabawi na human sa ngil-ad niyang knockout nga kapildehan sa mga kamot ni Nicholas Walters niadtong Oktubre. Gusto usab ni Donaire nga makakuha og rematch sa laing boksidor nga mipilde kaniya nga si Guillermo Rigondeaux alang sa WBO ug WBA title.

"I believe that I am still a world title contender and If you ask me, I want a shot at the belt as soon as possible," matud pa niya. "I am open to a rematch with (Guillermo) Rigondeaux but aside from him", I also want the WBC champion (Leo Santa Cruz).

Samtang sa undercard, si unbeaten 'Prince' Albert Pagara (24-0, 16KOs) milampos pagdepensa sa iyang IBF International junior featherweight belt pinaagi sa fifth round stoppage batok ni Mexican Rodolfo 'Fofo' Hernandez (26-6, 24KOs). (BANAT NEWS)