ERM/Palawan gisubha’g daog sa 4th CBBL tournament

CEBU, Philippines – Mipauwan og lima ka triples si Junjie Loyola alang sa bisitang ERM/Palawan  nga gisugat og daog batok sa Central, 58-56 sa pagsugod sa 4th Consolacion Barkadahan Basketball League (CBBL) tournament niadtong Domingo  sa Brgy. Pulpogan gym sa Consolacion.

Sa kinatibuk-an, si Loyola miiskor og  24 puntos aron pangulohan ang ERM/Palawan, kinsa misutoy human molabaw sa labing unang higayon, 37-35 sa  third period. Nanginit sab  og maayo si Jay Zafra, kinsa mipabuhagay og 22 puntos alang sa ERM/Palawan nga nahulga dihang miaksiyon og sikit ang  Central sa himalatyong oras sa duwa.

Si Tata Paterno milabyog og 14 puntos, samtang si Leo Uribe mikandos og 11 puntos  alang sa napildeng Central.

Ang liga gipaluyohan sa Erika’s Delight Bakeshop ni Erwin Flores, Pulpogan Motorparts ni Fritz Pagodon, Orlmon Video ni Lando Mondarte ug Shea’s Delicious Peanut ni Sheila Escorial.

Puntos Matag Usa

ERM/PALAWAN (58) – Loyola 24, Zafra 22, Tejada 6, Temblor 2, Timkang 1.

CENTRAL (56) – Paterno 14, Uribe 11, R. Jayme 6, P. Jayme 4, J. Jayme 4, C. Jayme 4, Burlaos 4, Tejada 4, Gabutan 2, Flores 2. (BANAT NEWS)