CEBU, Philippines - Paninguhaon ni Cebuano mixed martial artist Cary 'The Prince' Bullos nga moiskor sa labing una niyang daog sa ONE Championship batok ni Malaysian Ev Ting karong gabii didto sa Stadium Putra sa Kuala, Lumpur Malaysia.
Kini ang ikaduhang away ni Bullos sa labing dakung MMA tournament sa Asya. Sa una niyang sangka, napilde siya pinaagi sa submission ngadto ni American Major Overall miaging tuig didto sa Singapore.
Damgo ni Bullos nga mahimong unang Cebuano nga modaog sa ONE Championship. Una nang misuway ang kanhi pro boxer nga si Joseph Omana ug Vaugh Donayre, apan nangapakyas.
Si Bullos adunay rekord nga 7-2, samtang si Ting nagbitbit og 8-2 nga baraha. Gawas ni Bullos, laing Pinoy nga si Ramon Gonzales sa Mindanao ang moaway batok ni Chan Rothana sa Cambodia. (BANAT PALARO)