CEBU, Philippines – Sila si Richard Natividad ug Venancio Loyola nagtabla sa katapusang hugna, apan pulos sila nagmalipayon kay sila man maoy mipatigbabaw sa ikaduhang edisyon sa Rapid Chess Club Open Tournament niadtong Domingo didto sa E-Mall Activity Center.
Si Natividad mitapos sa maong 7-round Swiss system competition bitbit ang 6.5 puntos aron pagsakmit sa titulo, samtang si Loyola nalandig sa ikaduhang puwesto sa natali niining 5.5 puntos.
Gumikan sa iyang kadaugan, si Natividad mibulsa og P2,500, samtang si Loyola nakadawat og P1,500.
Sila si Glenn Pardillo, Reymond de la Peña ug Joel Pacuribot pulos nakaangkon og 5.0 puntos, apan si Pardillo maoy mipahiluna sa ikatulong dapit gumikan sa mas taas niining tie-breaker.
Ang duha ka adlaw nga torneyo nagmalampuson gumikan sa suporta nilang Deo Florita ug Cris Klaus. Ang mga duwa gipadagan ni FIDE Arbiter Marvin Y. Ruelan. (BANAT NEWS)