CEBU, Philippines - Human sa pito ka tuig, mobalik na sab ang triathlon event didto sa lungsod sa Medellin sa amihanang bahin sa Sugbo pinaagi sa Funtastic Medellin Triathlon Cup karong Abril 19 didto sa Alpine Wharf Kawit.
Matud pa ni Medellin tourism consultant Jeanette Malinao, nga ang maong kalihukan usa ka pamaagi aron pagpasundayag sa kaanyag sa ilang dapit gawas nga ila pang mahashas ang abilidad sa mga atleta sa maong natad sa paugnat sa kusog.
“This is an opportunity to showcase the beauty of the town as it is also one of the visited places in Central Visayas,” matud pa ni Jeanette Malinao atol sa usa ka press conference kagahapon didto sa Fuente Pension.
Ang kompetisyon naglangkob og long, sprint ug super-sprint distance.
Ang rota sa long distance magsubay og 1.6 kilometer swim, 60 kilometer bike ug 15 kilometer run.
Mga age group ubos sa maong kategoriya mao ang 19-under, 20-24, 25-30, 31-35,36-40, 41-45, 46-49 ug 50-above.
Kadtong interesado nga mosalmot mahimong morehistro online pinaagi sa www.sugbutriathlon.com. Mahimo sab sila nga mobisita sa The Brick nga anaa mahimutang sa Ebloc Tower 1/JP Morgan building sa Cebu I.T. Park o dili ba sa SATS office, atbang sa Gaisano Grandmall sa Talamban.
Ang registration fee nagkantidad og P2,500 sa long distance ug P2,000 sa sprint. Matag miyembro sa relay pabayron og P1,500. Apil na sa bayad ang souvenir t-shirt, swim cap, lunch ug finisher’s medal. (BANAT PALARO)