CEBU, Philippines – Pakyas si ALA boxer Jimmy ‘Popeye’ Paypa sa iyang tinguha pagsakmit sa Oriental and Pacific Boxing Federation super bantamweight belt human siya na-knockout sa first round batok ni Japanese champion Shingo Wake sa miaging gabii didto sa Tokyo, Japan.
Sa taho gikan ni ALA trainer Michael Domingo, kinsa miuban ni Paypa didto sa Japan, agresibo nga miatake ang Cebuano fighter sa pagsugod sa away. Nakapatugpa pa kini og mga solidong hooks ngadto ni Wake, apan nakakita og buslot sa depensa ang Hapon aron makapalusot og bangis nga uppercut nga mipatumba ni Paypa. Misuway pagrekober ang ALA fighter, apan naabtan na siya sa ihap sa referee sa katapusang dos minutos sa away.
Ang 27-anyos nga si Wake adunay rekord nga 18-4, 11KOs, samtang si Paypa nakahiagum sa ikatulo niyang pilde sa 19 ka away. (BANAT NEWS)