UPS/Wally, 2-0 NA SA Vendredi caging

CEBU, Philippines - Temporaryo karong nag-una sa standing ang UPS/Wally human  molansang sa ilang ikaduhang sunod-sunod nga daog sa 2nd season sa Vendredi Ballclub basketball tournament niadtong Lunes  didto sa Garden Bloom Village open court sa Pitogo, Consolacion.
Ang UPS/Wally midaog batok sa undermanned DHL/Nonoy sa iskor nga 84-75 ubos sa pagpangulo ni Cesar Bragas, kinsa mikamada og 19 puntos, samtang laing upat niya ka teammates ang mitamla sab og double figures alang sa UPS/Wally nga nagbitbit na karon og 2-0 nga baraha.
Dili hinuon ikamahay sa DHL/Nonoy ang maong kapildihan sa una nilang duwa kay bisa’g kulang sila, nakapakita gihapon sila og maayong labok. Gani ila pa nga gilisud-lisod ang UPS/Wally nga maoy bugtong nilang paagi aron mapanalipdan ang dakung lubong.
Sa pasiunang duwa, ang JRS/Lamay nakabawi gikan sa ilang kapildihan dihang ilang gipahimungtan ang LBC/Daru ug gilubong pa sa iskor nga 99-72.
Gipangulohan ni Marchin Rojas ang kadaugan pinaagi sa iyang 29 puntos.  Ang JRS/Lamay nagdala karon og 1-1 nga baraha, samtang ang LBC/Daru adunay 0-2 record ning maong torneyo nga gisuportahan sa Geobert Merchandise nga gipanag-iya ni Onesimo ‘Geobert’ Sajot.

puntos matag usa
Unang duwa:
JRS/LAMAY (99) – Marchin 29, Adonis 19, Aton 15, Junrex 10, Jao 9, Tamak 8, Lamay 5, Badok 4.
LBC/DARU (72) – Rian 31, Popoy 18, Daru 10, Francis 9. Exel 4.
Ikaduhang duwa:
UPS/WALLY (84) – Cesar 19, Bensoy 18, Serg 16, Archie 15, Kyu 10, Abai 4, Wally 2.
DHL/NONOY (75) – Eric 25, R.R. 13, Joel 13, Clark 8, Edward 8, Jay 8. (BANAT NEWS)