CEBU, Philippines – Dugang korona ang nahipos sa ERCO BRO Nationals ug Don Bosco Technology Center (DBTC) human nidomar sa laing dibisyon sa 12th Thirsty Football Cup niadtong Domingo diha sa Cebu City Sports Center.
Human misakmit og titulo sa men’s 38-above division, ang ERCO BRO-B naghari sab sa boys 23 division human gipilde ang Pocket Monsters, 1-0 sa finals.
Sa laing bahin, ang DBTC milangkat sa ilang ikatulong korona pinaagi sa pagpukan sa Higala, 3-1 sa boys 15 class. Ang DBTC una nang midaog og korona sa mixed under-7 ug sa under-divisions.
Ang Bright Academy-A mibitbit sab og championship trophy sa boys 13 age group human ilang gipilde ang bisitang Rosevale School sa Cagayan de Oro City, 1-0 pinaagi sa game-winning goal ni Ritchel Gerasmio.
Ang Bright Academy-A mipilde sa Giuseppe FC, 1-0 aron moduwa sa finals batok sa Rosevale School nga mipalagpot sa Barili FC, 1-0. (BANAT NEWS)