CEBU, Philippines - Ang Rain or Shine Elasto Painters ug Alaska Aces moparada sa bag-o nilang import sa ilang duwa karon sa PBA Commissioner’s Cup didto sa Smart Araneta Coliseum.
Ang Painters-Aces showdown sugdan sa alas-7 sa gabii, human sa duwa tali sa sister-teams Talk ‘N Text Tropang Texters ug NLEX Road Warriors.
Iparada sa Painters ang bag-o nilang import nga si Wayne Chism, kinsa ilang gikuha hulip ni Rick Jackson. Ang Painters wala matagbaw sa gipakitang labok ni Jackson sa ilang kampanya karon nga conference.
Sa ilang bahin, ang Aces bisan pa’g midaog sa miaging duwa batok sa San Miguel Beermen, mipapauli ni DJ Covington ug mikuha ni kanhi NBA high-flyer si Damion James.
Si Chism maoy import sa Rain or Shine sa miaging tuig diin mipuwesto sila sa ikatulong dapit, samtang si James, usa ka NBA veteran nga miduwa kaniadto sa San Antonio Spurs, Atlanta Hawks ug New Jersey Nets.
Mag-ilis sab og import ang Texters, kinsa mikuha sa serbisyo ni ex-NBA bigman Ivan Johnson puli ni Richard Howell. (BANAT PALARO)