CEBU, Philippines - Gidemolis sa PAREF-Springdale ang kontra nilang Alcoy Football Club, 8-1 aron moabante ngadto sa quarterfinals sa boys under-18 division sa Aboitiz Football Club niadtong Domingo diha sa Cebu City Sports Center (CCSC).
Ang PAREF-Springdale nga ubos sa Group A nagbitbit og perpektong baraha, 3-0.
Sa laing bahin, ang defending under-18 champion Don Bosco Technology (DBTC)miiskor sab og daog dihang ilang gisirohan ang Leylam FC, 4-0. Apan bisan pa niana, ang Leylam may kahigayonan pa gihapon nga moabante sa quarterfinal round sanglit ang nag-unang duha ka teams sa matag bracket molahos sa sunod nga hugna.
Ang Abellana National School-Pomeroy midaog sab pinaagi sa pagpukan sa Bright Academy, 2-1.
Didto sa Sacred Heart School-Ateneo de Cebu (SHS-AdC) football field, ang Consolacion FC miiskor og duha ka daog sa under-7 class batok sa DBTC-B, 3-0 ug sa MAD FC, 2-1. Ang MAD mikulit sab og sunod-sunod nga kadaugan human gipilde ang DBTC-D,9-0 ug DBTC-B, 4-0.
Sa girls under-15 bracket, ang Tabor Hills mipilde sa Bright Academy, 3-0, samtang ang ilang under-18 squad mitapos sa duwa nga 3-all draw uban sa SAIS. Ang St.Theresa’s College (STC) mipilde sa SRFC, 2-0.
Didto sa San Roque Parish football field, ang DB Savio nimasaker sa SAIS, 6-0 sa under-11 division. Ang PAREF-Springdale mipukan sab sa DBTC-A, 2-1. Ang DBTC-B ug San Roque FC nagtabla nga walay iskor, ingon man ang mga duwa tali sa DBTC-C ug MAD FC ug Magone ug BMALV. (BANAT NEWS)