Raga, Cuna miratsada

CEBU, Philippines - Literal nga milusot sa lungag sa dagom  si Anton Raga  kay  human modaog sa wildcard, midaog  sab  kini batok ni Wang  Can  sa China, 9-5 sa pagsugod sa MP International 10-Ball billiards tournament didto sa SM City-GenSan.
Si Raga, ang  2015 Sinulog Cup 9-Ball champion, bag-o lang milusot sa iyang wildcard qualifying round.  Usa siya sa upat ka mga cue artists gikan sa Sugbo nga nanimpad didto sa Gensan.
Ang teammate ni Raga  nga si Ruben ‘Meot’ Cuna  midaog sab batok kang Ricky Serna sa Negros Oriental, 9-4.
Ang ikatulong pambato sa Sugbo nga si Butch Augusto nagduwa pa ning pagkasuwat kagahapon.
Si Elaga Abellana maoy ikaupat nga  Sugbuanon nga misalmot, apan  natagak siya kagahapon segun sa resulta nga gipadangat dinhi sa Banat News ni CCSC commissioner Lorenzo ‘Chao’ Sy. (BANAT NEWS)