Mancio moaway pagbalik

CEBU, Philippines – Ang Sugbuanaong boksidor nga si Jerson ‘Smooth Operator’ Mancio (18-5, KOs) mohimo sa iyang comeback fight batok ni Jonas ‘Zorro’ Sultan (6-2, 4KOs) sa main event sa ALA Promotions-Cobra Energy Drink 'Tunay na Lakas Boxing' karong Sabado sa gabii didto sa Murcia Sport and Cultural Center sa Murcia, Negros Occidental.

Si Mancio siyam ka buwan nga mipahuway ug andam na siya nga mopakita pag-usab sa iyang potensyal nga mahimong regional champion. Si Mancio miaway alang sa OPBF light flyweight title duha na ka tuig ang milabay, apan pakyas siya human mapilde pinaagi sa fifth round KO batok ni Japanese Naoya Inoue didto sa Tokyo,  Japan.

Misuway pagbangon si Mancio dihang miaway siya alang sa Philippine title, apan  napilde  gihapon pinaagi sa technical decision ni Benezer Alolod niadtong  Mayo sa miaging tuig didto sa Hyatt Hotel.

Sa supporting bout, ang former amateur standout nga si Boyce ‘Astro Boy’ Sultan (8-4, 5KOs) makigharong ni Geo ‘Santino’ Santisima (4-2, 3KOs) sa Masbate.

Mokompleto sa fight card mao ang sangka nila ni Jefcon Concerman vs. Raul Yu, Peter Apolinar vs. Ryan Quimbo, Virgil Vetor vs. Kenneth Neron, Jopher Montano vs. Paul Varona, Junnel Borlado vs. Ernesto Alera ug Elmer Liboon vs. Richard Lomugdang. (BANAT NEWS)