CEBU, Philippines - Miabot ngadto sa 128 ka mga tadhang bilyarista gikan sa nagkadaiyang dapit sa kalibotan ang magtigi alang sa prestihiyosong korona sa 2015 MP Cup World 10-Ball championship nga pormal nga buksan karong adlawa didto sa SM City Activity Center sa General Santos City.
Si Chang Yu Lung sa Taiwan, nga bag-ohay pang mipalagpot ni Niels Fiejen sa Netherlands isip maoy world No. 1 player, maoy topseed sa maong torneyo nga gipasiugdahan ni boxing superstar Manny Pacquiao, kinsa hilig sab kaayo sa maong duwa. Gani ang eight-division world champion nga si Pacquiao nagbansay-bansay og maayo kay usa man sab siya sa mga partisipante sa maong kompetisyon.
Lain pang tang-an nga mga entrante naglangkob nilang Darren Appleton sa Great Britain, Albin Ouschan sa Austria, Nick Ekonomopoulos sa Greece, Thorsten Hohmann sa Germany ug Radoslaw Babica sa Poland. Silang tanan anaa sa top 10 sa listahan sa World Pool-Billiard Association.
Ang mga pambato sa nasud nga moasdang sa maong torneyo mao sila si Dennis Orcullo ug Carlo Biado. Mobanat sab silang legendary world champions Efren ‘Bata’ Reyes ug Francisco ‘Django’ Bustamante ingon man silang Ronato ‘Ronnie’Alcano, Johann Gonzales Chua, Raymund Faraon, Warren Kiamco ug Elmer Haya.
Dul-an sa $300,000 (P13.4 million) nga ganting salapi ang iapud-apod ngadto sa mga mananaog, lakip na niini ang manghawod sa Manny Pacquiao Cup International 10-Ball Doubles tournament nga gikatakda karong Pebrero 22-26. (BANAT NEWS)