Dili ko mahadlok

CEBU, Philippines - Mipasalig si Milan ‘El Metodico’ Melindo  nga iyang pahimuslan og maayo ang gihatag kaniya nga ikaduhang higayon aron tumanon ang iyang damgo nga mamahimong world champion.
Kini human si ALA Promotions President ug CEO Michael P. Aldeguer mikompirmar nga miuyon na sila nga si Melindo mohagit ni IBF junior flyweight champion Javier ‘Cobra’ Mendoza karong Abril 25 didto sa Auditorio Municipal Fausto Gutiérrez Moreno sa Tijuana, Mexico.
Matud pa ni Aldeguer nga bisan og wala pa sila’y napirmahan nga kontrata, apan mahulog na nga selyado na ang tanan kay gamay na man lang kaayo ang mga isyu nga ilang sulbaron uban sa Zanfer Promotions sa Mexico nga maoy handler ni Mendoza.
“We haven’t signed any contract yet because there are still some details that have to be cleared out but yes, we have already agreed in principle about it (Melindo vs. Mendoza). It’s set for April 25 in Mexico," dugang pa ni Aldeguer pinaagi sa text message.
Nagkanayon si Aldeguer nga dili sila magpanuko pagpaasdang ni Melindo sa teritoryo sa iyang kontra kay salig  kaayo sila sa abilidad sa ilang batos.
Bisan gani si Melindo wala mahadlok nga manulong sa lugar sa iyang kaatbang kay alang kaniya mao kini ang tatak sa usa ka tinuod nga boksidor.
“Wala ko’y masulti nga lain kun  dili magpasalamat sa Ginoo nga gitagaan na sab ko’g higayon nga makadula og world title fight. Wala gyud ko mahadlok bisan asa pa dulaon kay kun  ikaw usa ka warrior, mas ma-challenge ka na modula sa lugar sa kontra. Mas more ang abilidad nimo nga mogawas,” batbat pa ni Melindo.
“Ako mensahe aning dulaa nga buhaton nako kutob sa akong mahimo aron ipakita kun kinsa ko sud sa ring,” dugang pa sa taga-Cagayan de Oro nga boksidor.
Alang ni Melindo, importante kaayo ang maong duwa kay tagsa ra moabot ang oportunidad aron makaaway  og world championship.
Sa una niyang pagsuway, napakyas si Melindo human gipilde pinaagi sa unanimous decision ni WBA/WBO flyweight champion Juan Francisco Estrada duha na ka tuig ang milabay didto sa Macau.
Sa iyang bahin, si ALA chief trainer Edito Villamor nagkanayon nga doble kayod gyud sila sa ilang training kay dekalibre man ang makontra ni Melindo, gawas pa nga adto sa teritoryo niini mahitabo ang engkuwentro.
“Lig-on ang iyang kontra kay world champion, then didto pa gyud duwaon sa Mexico maong gi-prepare gyud namo si Milan sa best condition niya ever,” matud pa ni Villamor. (BANAT NEWS)