CEBU, Philippines – Mipatigbabaw si Regelito Hortelano sa 33 ka mga entrante aron pagsakmit sa titulo sa Barangay Lourdes Fiesta Chess Tournament niadtong Domingo didto sa Bogo Rizal Park sa dakbayan sa Bogo amihanang bahin sa Sugbo.
Si Hortelano, nga miyembro sa Cebu Executives and Professionals Chess Association (CEPCA), mitapos sa maong 7-round Swiss system competition nga way pilde aron pagkulit sa kinatas-ang 6.5 puntos.
Ang garbo sa Bogo nga si Jasper Doldolea ug si Michael Tinga sa isla sa Bantayan mitali og managsamang 5.5 puntos matag usa, apan si Doldolea maoy nipahiluna sa ikaduhang dapit gumikan sa mas taas niining tie-breaker ginamit ang Bucholz system.
Gumikan sa ilang kadaugan, si Hortelano mibulsa og P2,000, samtang sila si Doldolea ug Tinga midawat og P1,500 ug P1,000.
Ang duha ka adlaw nga torneyo giorganisar nilang konsehal Kent Faciol ug Jesiel Doldolea. Ang mga duwa gipadagan ni local arbiter Edwin Monsalud. (BANAT NEWS)