2nd round ra kutob

DAVAO CITY, Philippines – Gipakita ni ALA boxer Jason 'El Niño' Pagara (35-2, 22KOs) nga andam na siya sa mas dagku pang hagit sa iyang karera human niya gipaundang sa round 2 ang Mexican nga si  Cesar 'El Dolar' Chavez (23-8, 11KOs) sa Mexico aron depensahan ang iyang WBO International super bantamweight title sa event sa 'Pinoy Pride 29: Fists of Fury’  niadtong miaging gabii didto sa University of Southern Eastern Philippines.

"Dili gyud sayun basta Mexican boxer imo kontra pero salig man ko sa ako skills mao sab nga sayu nako siya na knockout," matud pa ni Pagara.

Sayung gipabuthan ni Pagara og mga kusug nga mga kombinasyon sa lawas si Chavez kinsa miluhod og kaduha sa opening round. Nakarekober pa hinuon ang Mehikano aron mupadayon sa sunod nga round.

Pagsulod sa second round, misamot ang kaagresibo ni Pagara uban usab sa abiba sa mga Pinoy fans. Ning tungura usa ka bangis nga left hook sa apapangig ang gipatugpa ni Pagara nga mipahayang sa Mexican boxer.

Naglisud na pagrekober si Chavez human sa maong atake rasun nga giundang na ni referee Bruce McTavish ang away sa 1:56 sa second round.

Sa maong kadaugan, si Pagara segurado na nga moaway sa main event sa labing unang fight card sa ALA Promotions sa Estados Unidos nga magsugod sa Mayo 23 didto sa San Diego, California.

"Jason will now have a US campaign for the rest of the year starting on May and hopefully this will show that he is now on the next stage of his career," matud pa  ni ALA Promotions President and CEO Michael Aldeguer. "He will also undergo extensive training camp in the US as he prepares for a future world title shot."

Sa laing bahin, di sama ni Pagara, ang iyang stable mate nga si WBO Intercontinental super bantamweight champion  Genesis 'Azucal' Servania (26-0, 11KOs)  nanginahanglan pa og 12 ka rounds aron pildehon si  Luis 'Perla Negra' Hernandez (17-4, 9KOs).

Pakyas si Servania pag-KO sa Mehikano kinsa nagpunay og dagan, apan bisan pa niini, nakuha gihapon sa ALA boxer ang unanimous decision nga kadaugan.

 Sa undercard, milampos usab si 'King' Arthur Villanueva (27-0, 14KOs) pagtubag sa dakung hagit sa iyang karera human niya gipukan pinaagi usab sa unanimous decision ang former world champion nga si Julio Cesar 'Pingo' Miranda (38-12, 29KOs).

Ang featherweight prospect nga si Mark 'Magnifico' Magsayo (10-0, 8KOs) milatos ni Sukkasem Kietyongyuth (13-4, 8KOs) sa Thailand sa fifth round, samtang si Arjan 'Spartan' Canillas (10-0-2, 8KOs) mipaundang ni Indonesian Stevi Ongen Ferdinandus (15-8, 8KOs) sa fourth round. (BANAT NEWS)