Davao City, Philippines – Nasayod si WBO International junior welterweight champion Jason ‘El Niño’ Pagara (34-2, 21KOs) nga duol na siya sa usa ka world title shot ug gusto niyang ipakita nga andam na siya pinaagi sa pagrehistro og daog batok ni Mexican challenger Cesar ‘El Dolar’ Chavez (23-7, 11KOs) sa Mexico sa main event sa “Pinoy Pride 29: Fists of Fury” karong gabii didto sa University of Southern Philippines gym.
“Ingon siya (Chavez) nga modaog siya pero di na mahitabo kay andam ko modaog pinaagi sa knockout,” matud pa ni Pagara nga mitimbang og 138 lbs., gaan og usa ka libra ni Chavez.
“Kun mahimo nako nga matumba siya sa second round, akong paningkamuton,” dugang pa niya.
Ang daog mopalig-on sa kahigayonan ni Pagara nga moaway alang sa bakanteng WBO title, ilabi na nga ranked No. 4 siya sa 140 lbs. division uban ang mga ngilngig nga pangan sama nila ni Chris Algieri, Lucas Matthysse ug Ruslan Provodnikov.
Hinuon, si ALA Promotions President and CEO Michael Aldeguer mitug-an nga sa dili pa ang world title fight, kinahanglan modaog ni Pagara aron mahitabo ang iyang sangka sa Estados Unidos sa Mayo sa labing unang fight card sa ALA Promotions sa maong nasud.
Sa supporting main event, laing ALA world title contender Genesis ‘Azucal’ Servania (25-0, 11KOs) laraw sab nga moiskor og knockout nga kadaugan batok ni Luis ‘Perla Negra’ Hernandez (17-3, 9KOs) aron mapanalipdan ang iyang WBO Intercontinental super bantamweight title.
Sa iyang bahin, si ‘King’ Arthur Villanueva (26-0, 14KOs) mag-atubang og lisud nga hagit sa iyang pakigharong sa former world champion Julio Cesar ‘Pingo’ Miranda (38-11, 29KOs) sa ilang 10-round non-title bout. Sa undercards, laing ALA rising star nga si Mark ‘Magnifico’ Magsayo (9-0, KOs) makigbinukbukay ni Sukkasem Kietyongyuth (13-3, 8KOs) sa Thailand, samtang si Arjan ‘Spartan’ Canillas (9-0-2, 7KOs) makigsinukliay og kumo ni Stevi Ongen Ferdinandus (15-7, 8KOs).