Carkiena, Palawan Pawnshop daog dayon
CEBU, Philippines – Miiskor dayon og daog ang Carkiena ug Palawan Pawnshop/ERM sa managlahi nga paagi sa pagsugod sa 3rd Consolacion Barkadahan Basketball League (CBBL) niadtong Domingo sa gabii didto sa Barangay Pulpogan gym sa Consolacion, Cebu.
Ang Carkiena nga gipaluyohan sa Vendride Ballclub walay kukaluoy nga milubong sa San Narciso sa iskor nga 90-45, samtang ang Palawan ERM miagi pa sa kalisud una maangkon ang kadaugan sa maong liga nga gipasiugdahan sa VIMBRA sa paningkamot ni Edward Escorial sa abag nilang Noel Calo, Yanie Apas ug Rey Cortes.
Lima ka players ang miiskor og double figures alang sa Carkiena ni coach Wally Bragas. Gipangulohan kini ni Yanskee Capao, kinsa mitira og 20 puntos, gisundan ni Cesar Braggy sa iyang 16 puntos, Stephen Sanchez nga adunay 14 puntos. Sila si Allan Abrasado ug Bryan ‘Lamay’ Burlaos mitampo’g 11 ug 10 puntos matag usa alang sa Carkiena nga misutoy human moposte’g 21-14 sa halftime.
Si Kerry Quirol mao lang ang bugtong miiskor og double figures alang sa San Narciso pinaagi sa iyang 16 puntos.
Sa laing bahin, si Jovie Zafra mao sab ang nangu sa Palawan ERM nga miantog og 14 puntos, samtang sila si Adrian Taborada ug Timkang nagkumboya’g 21 puntos. Ang napildeng Fallen 44 gipangulohan sab ni Randy Povadora, kinsa mipabuhagay og 20 puntos.
Walo ka teams ang misalmot sa torneyo nga gibahin ngadto sa duha ka brackets -- A ug B.
Naglangkob sa bracket A mao ang Fallen 44, Palawan Pawnshop ERM, Mt. Olives ug Kian, samtang nagpundok sa bracket B mao ang San Narciso, Carkiena, Shane Trishia ug GT Flying V.
Ang top two sa matag bracket moabante sa crossover semifinals. Ang modaog maoy mag-abot sa knockout finals, samtang ang mapilde mag-ilog alang sa ikatulong dapit.
Puntos matag usa
Unang duwa:
CARKIENA (90) – Yanskee 20, Braggy 16, Sanchez 14, Al. Abrasado 11, Burlaos 10, Ar. Abrasado 9, Beryong 6, Tan 5, Aljero 5, Marchin 4.
SAN NARCISO (45) – Quirol 16, Bemboy 9, Mondarte 8, Tibon 4, Quintay 4, Cyril 4.
Ikaduhang duwa:
PALAWAN E.R.M. (65) – Zafra 14, Taborada 11, Timkang 10, Tata 6, Alinsugay 6, Alib 5, Dinoy 4, Loyola 4, Tancio 3.
FALLEN 44 (60) – Povadora 20, Paopao 9, Monsanto 8, Lastimosa 6, Obina 5, Skye 4, Comeros 4, Mistula 2, Quiapo 2. (BANAT NEWS)
- Latest
