CEBU, Philippines – Ang multi-titled go-cart racer nga si Vince Adrian Rojo maoy milangkat sa labing taas nga pasidungog 2014 Kartzone Superkart Series atol sa Awards Night niadtong Sabado didto sa Harold’s Hotel.
Gawas nga maoy gikoronahang overall champion sa KT expert category sa nakulit niining 444 puntos human sa seven-leg series, si Rojo mao sab ang milabni sa 'Karter of the Year' award.
Nakigtimbaya siya uban sa lain pang mga category champions nga naglangkob nilang Rei Aleman sa KT masters, Jarond Mesina sa KT novice, Frederick Cortes sa Honda expert, Norris See sa Honda novice ug Keon Romoff sa SQ cadet.
Sa Autocross Solo, si Mark Paray misakmit og duha ka titulo aron pag-angkon niini sa pasidungog isip ‘Driver of the Year.’ Nanghawod siya sa open category human mitali og 47 puntos ug ingon man sa modified heavy expert bitbit ang 55 puntos.
Sila si Dan Davino ug Sven Serafica mapasigarbuhon sab kaayo nga mipaso ngadto sa podium human mohakot og tagtulo ka titulo. Si Savino midominar sa modified light novice, superstreet light novice ug modified heavy novice, samtang si Serafica naghari sa superstreet heavy novice, street light novice ug street heavy novice nga mao sab ang nagtuboy kaniya aron labnihon ang tropeyo isip ‘Rookie of the Year.’ (BANAT NEWS)