CEBU, Philippines - Sugdan na ang aksiyon sa 17th Aboitiz Football Cup karong adlawa sa duha ka managlahing binyu sa dakbayan sa Mandaue.
Ang San Roque Parish field sa barangay Subangdaku maoy mo-host sa mixed under-11 ug boys 18 categories, samtang ang ubang mga duwa adto sa Sacred Heart School-Ateneo de Cebu sa Barangay Canduman.
Miabot ngadto sa 20 ka koponan nga gibahin sa upat ka brackets ang magsangka sa under 11.
Ubos sa group A mao ang SHS-Ateneo de Cebu, Lahug FC-A, San Roque FC, University of San Carlos-BED ug Don Bosco Technology Center-B, samtang ang group B dunay Bright Academy-A, Cebu International School, Mad, St. Theresa’s College ug DBTC-C.
Naglangkob sa group C mao ang Bright Academy-C, Suba-Basbas, BMAL-B, Lahug FC-B ug DB Magone ug ang group D gilangkuban sa Paref-Springdale, Consolacion, Timex, DBTC ug DB Savio.
Ang boys under-18 nakahakot og 17 ka teams. Mowadwad sa ilang abilidad sa group A ang Paref-Springdale, Alcoy FC, CIC-Mandaue ug University of Southern Philippines Foundaton.
Ang SHS-AdC, Alegria, CIS, ERCO ug University of San Jose-Recoletos naapil sa group B, ang DBTC, Benthel Asia, Leylam ug Real Galaxy sa group C, ug ang Abellana National School, Bright, USC-BED ug Mad FC sa group D.
Didto sa SHS-Ateneo, banatan ang mixed under-9 ug girls 15 ug 18-under. 17 ka teams ang magtigi sa under-9 division, sagad gikan sa DBTC nga mipadala og unom ka teams sa nagkadaiyang grupo. Lain pang mga entrante mao ang Bright Academy, SRFC, USC-BED, Sais Gannet, STC, Springdale, Cebu Dynamo, Consolacion, SHS-AdC, Cebu Learning ug CIS.
Lima ka teams ang mag-engkuwentro sa girls 15 ug kini mao ang SHS-AdC, STC, Tabor Hills, Bright Academy ug Mactan Spartans.
Sa girls 18, gibahin ang 11 ka teams sa duha ka group. Naglangkob sa group A mao ang SHS-AdC, CIS, ERCO, Bright Academy, Talisay Raskals ug Tayud United, samtang ang nalakip sa group B ang SRFC, STC, CIC-Mandaue, SAIS Gannet ug Tabor Hills FC.