San Arwind: Santos sa San Miguel

Usa ko sa liboan ka fans nga nagmaya sa kadaugan sa San Miguel Beermen batok sa Alaska Aces sa bag-o lang natapos nga PBA Philippine Cup. Apan bisan pa sa ilang kainilog, tataw kaayo nga mapit-os nga dalan ang naagian sa Beermen sa wala pa modimdim sa katam-is sa kalampusan.

Tiaw muna, sa upat ka duwa sa serye, kanunay silang mahisugamak human makalabaw og kapin sa 20 puntos. Gani sa Game -7 sa ilang title series niadtong Miyerkules sa gabii didto sa Smart Araneta Coliseum, ang mga batos  ni coach Leo Austria hapit na sab madisgrasya human makalabaw og 23 puntos sa first half.

Maayo na lang gani kay dunay literal nga 'Santos' ang San Miguel. Ang akong pasabot si Arwind Santos nga mipasud sa mahinungdanon niyang mga tirada aron pag-aswat sa Beermen ngadto sa kulbahinam kaayong  80-78 nga kadaugan batok sa Aces aron pagsakmit sa kampiyonato nga idlas kaayo sa ilang mga kamot sa milabay nga 14 ka tuig.

Mao kadto ang labing unang All-Filipino title sa San Miguel sukad ilang gibuntog ang Barangay Ginebra Kings niadtong tuig 2001.

Sa tibuok serye, si Santos miposte og impresibong average nga 18.5 puntos, 9.7 rebounds, 2.5 blocks, 2.2 assists ug 1.4 steals matag duwa hinungdan sa paglabni niini sa Finals MVP award. Sa gipakita niyang katakus, makaingon ko nga akong kumpare matawag nakong si San Arwind, ang patron nga santos sa San Miguel.

* * *

Gawas ni Santos, lain pang angayan nga ibayaw sa himaya sa kampo sa San Miguel mao si Junemar Fajardo, ang garbo natong mga Sugbuanon.

Dili sab mabangbang ang gipakitang duwa sa labing dominanteng sentro karon sa basketbol dinhi sa Pilipinas. Sa maong deciding game, mipupo siya og 21 puntos ug 25 ka rebounds aron pagkulit og kasaysayan isip labing unang local player nga nakamugna og 20-20 sa finals. Mao kana ang angayan nga kahadlokan sa umaabot pa nilang kaatbang.

Ang timaan nga ang lumad nga taga-Pinamungajan nagkabangis kun abilidad ang hisgutan.Matag duwa aduna kanunay siya’y ikabuga ug bag-ong abilidad nga ikapakita.

Sa iyang gitas-on nga sama sa pader nga lisud banggaon, katayhas moitsa ug way kahadlok nga modarok sa bola, si Fajardo lisud pugngan ug ang iyang presensiya simbolo nga sa kanunay lig-on nga kandidato aron makampiyon ang sa bisan unsa mang team siya mapunta. Sa pagka karon, ang prangkisa sa San Miguel maoy bulahan kay anaa man sa ilahang poder ang basketbolista nga dili lamang higante sa gidak-on, apan hasta sab sa talento, kadasig ug determinasyon.

Sa tibuok tropa sa San Miguel Beermen, akong itunol ang mainiton nakong pahalipay. Dungan niini ang akong pagsaludo sa Alaska Aces kay  ila mang napamatud-an nga angayan silang nakataak sa finals. Sa kanunay ilang gibuhat ang tanan ug gani kapila pa sila nakahimo og milagro, galing lang kay napakyas sa katapusan. Apan ang labing importante, nakahatag sila og makapaisag-balhibo nga away batok sa Beermen nga gisunod sa tanan hangtod sa katapusang segundo sa serye.

Kun dunay mga komentaryo o reaksiyon mahimong mo-email sa [email protected]