CEBU, Philippines – Ang Barangay Ginebra San Miguel ug Meralco Bolts nga pulos wala kasulod sa semifinals sa miaging Philippine Cup, laraw nga mamawi ug sugdan nila kini batok sa usa’g-usa sa opener sa PBA Commissioner’s Cup nga sugdan karong adlawa didto sa MOA Arena.
Ang Kings ug Bolts magtakus sa alas-7 sa gabii human sa sangka tali sa Globalport Batang Pier ug Kia Carnival sa alas-4 sa hapon.
Masentro karon sa panan-aw sa mga fans ang Ginebra tungod kay gawas nga aduna sila’y bag-ong coach nga si Ato Agustin hulip ni Jeff Cariaso, sila usab ang nakakuha sa NBA prospect nga si Michael Dunigan isip import.
Ang Ginebra maninguhang mamawi ug hingpit nga mapakita nga may abilidad sila nga mokampiyon pag-usab ilabi na nga sila ang giisip nga labing sikat nga koponan sa liga.
Si Dunigan maglaum og suporta gikan sa mga lokal nga sila si Mark Caguioa, LA Tenorio, Japeth Aguilar ug Greg Slaughter.
Sa ilang bahin, si Davis kinsa sinati na sa PBA isip veteran import andam nga makig-atbang ni Dunigan. Ang Bolts ni coach Norman Black kompiyansa ni Davis, kinsa niduwa sa NBA D-League.
Ang Bolts bidahan usab nila ni Jared Dillinger, Reynel Hugnatan ug Gary David. (BANAT NEWS)