Gumban moaway alang sa Phl super flyweight title

CEBU, Philippines - Tungod kay giisip siya nga usa sa mga kaugmaon sa ALA Boxing Gym, si Melvin ‘Top Gun’ Gumban maningkamot nga  mopaduol sa iyang damgo nga mahimong regional champion.

Ang 24-anyos nga si Gumban (18-0, 9KOs) mosuway pag-iskor og daog sa sangka niya batok ni Weljan Ugbaniel (13-2, 4KOs) alang sa bakanteng Philippine super flyweight championship nga maoy mohimo kaniya nga usa ka regional title contender.

Ang Gumban-Ugbaniel showdown maoy main event sa tinuig nga Sinulog Boxing Festival nga proyekto sa ALA Promotions ugma didto  sa Gaisano Countrymall carpark.

“Si Albert (Pagara) ug Arthur (Villanueva) pulos na regional champions ug mao pud na ako gusto makuha mao nang buhaton gyud nako tanan aron modaog ning awaya,” matud pa ni Gumban atol sa press conference kagahapon didto sa Sugbahan restaurant sa A.S. Fortuna St., Mandaue City.

“Dili lang sa pagdaog sa akong unang boxing championship, makatabang pud ni nako nga makakuha og dakung away ilabi na sa Pinoy Pride.”

Ang garbo sa Escalante City, Negros Occidental lab-as pa sa iyang first round KO nga kadaugan batok ni Roger Echavez niadtong Oktubre 18 didto sa Negros Occidental Multi-Purpose Activity Center sa Bacolod City.

Sa supporting bout, si Elmo ‘Bisdak’ Traya (6-1, 5KOs) makigsinukliay og kumo ni Giovani Rota (7-4, 7KOs) sa Butuan City sa usa ka eight-round lightweight bout.

Mokumpleto sa fight card mao ang sangka tali nila ni Vicente Casido batok Bryan Samson, Melvin Jerusalem batok Rez Padrogane, Gerald Suico batok Junrex Saldivia, Michael Estrella batok Jonne Burlado, Junder Gregorio batok Jesson Horteza ug Joepher Montano batok Junie Villacrusis.