CEBU, Philippines - Misangpot na sa kritikal nga sitwasyon ang serye tali sa San Miguel Beermen ug Alaska Aces tungod kay pulos sila nangambisyon nga makuha ang daog sa Game-5 sa ilang ‘best-of-seven’ finals series karong adlawa didto sa Smart Araneta Coliseum.
Ang San Miguel ug Alaska nga nagtabla sa series, 2-2, magharong pag-usab sa alas-7 sa gabii diin ang modaog adunay kahigayonan nga modaog sa All-Filipino Cup title.
Ang Beermen nakabangon human sa ilang makauuwaw nga kapildihan sa Game-3 dihang ila nga gilubong ang Aces sa Game-4, 88-70 niadtong Miyerkules.
Matud ni San Miguel head coach Leo Austria nga kun init nang daan ang unang upat ka sangka, mas atngan pa unya ang pisikal ug sikit nga pinaksitay nila batok sa Alaska.
Miangkon si Austria nga daku og matabang ang ilang daog sa Game-4 sa pagpataas sa ilang kompiyansa, apan dungan niini ang kabalaka tungod kay seguradong mohirit og daog ang Aces.
Sa iyang bahin, si coach Alex Compton sa Alaska miingon nga dili na siya gusto nga magsalig og usa ka comeback nga kadaugan ug giagni niya ang iyang mga batos nga likayan na nila nga malubong sa sayong bahin sa duwa.
Ang Alaska midaog sa Game-1 ug Game 3 pulos pinaagi sa second half rally, apan wala nila kini mausab sa Game-4 apan nahutdan sila sa kusog. (BANAT PALARO)