Villanueva mag-atubang bug-at nga misyon

CEBU, Philippines - Sagubangon ni undefeated ALA Gym boxer ‘King’ Arthur Villanueva (26-0, 14KOs) ang labing  dakung pagsuway sa iyang rising career sa pakigharong niya ni kanhi WBO light flyweight champion Julio Cesar ‘Pingo’ Miranda (38-11, 29KOs).

Ang Villanueva-Miranda showdown usa sa giatngan sa  ‘Pinoy Pride 29: Fists of Fury’ sa Pebrero 7 didto sa USEP Gym sa Davao City.

Mobida sa maong fight card mao si light welterweight prospect Jason ‘El Niño’ Pagara, kinsa makigharong ni Mexican Cesar ‘El Dolar’ Chavez alang sa WBO International title.

Batok sa usa ka former champion, ang 25-anyos nga si Villanueva tinguha nga mopakita nga andam siya sa usa ka world title shot.

Si Villanueva nga bag-o lang nakadepensa sa iyang IBF International super flyweight title pinaagi sa split decision batok ni Fernando Aguilar niadtong Septiyembre 5 didto sa Dubai, maoy No. 1 sa WBO, No. 3 sa IBF ug No. 7 ranked sa WBA.

“Daku gyud ning away para sa akon, ihatag gyud nako ang tanan aron mudaog ko kontra sa former world champion,” matud pa niya.

Ang 34-anyos nga si Miranda usa ka delikadong boksidor nga naghari sa light flyweight division lima na ka tuig  ang milabay sa wala pa kini mapilde ngadto  ni Brian Viloria niadtong tuig 2011.