‘Kumbati sa sogod’ sa Enero 25
CEBU, Philippines - Kulbahinam ug puno sa aksiyon ang idalit sa mga Cebuano fighters ngadto sa mga taga-Leyte sa ipahigayong MMA ug kickboxing tournament nga ulohan og ‘Kumbati sa Sogod’ sa Enero 25 didto sa Sogod Multi-purpose gymnasium sa Southern Leyte.
Si Yaw-Yan Alakdan Leyte founder Maestro Eric Albotra mitug-an nga 10 ka paresan sa MMA fighters ug kickboxers ang molingaw sa mga Leytehanons.
“Being the hermano mayor, gituyo nako nga mag-organize ani nga tournament isip halad usab ni Sr. Sto. Niño,” matud pa ni Albotra atol sa press conference kagahapon didto sa Yaw-Yan ArDigma gym. “But usa usab sa akong tuyo ani nga padula mao nga mahatagan og idea and exposure ang sports sa MMA and kickboxing ngadto sa mga taga-Leyte.”
Sa main event sa MMA, ang Universal Reality Combat Championship veteran nga si MJ Abrillo sa Yaw-Yan Kampilan makigharong sa taga-Iloilo nga si Julius Gonzaga sa ER Spawn MMA.
Ang Cebu-based French fighter nga si Paul Carrere makigbatok ni Raymund Libradilla sa Tatus Muay Thai and MMA sa co-main event.
Duha ka pambato sa Yaw-Yan ArDigma Cebu moatubang sa tagsa-tagsa nila ka mga kaatbang sa kickboxing event. Si URCC fighter Ruel Rosauro moharong ni Redner Mendoza sa Durex Dragon Kickboxing Club, samtang ang Batang Pinoy National Finals gold medalist nga si Ken Caniga makigsangka ni Benedict Torbiso sa Durex KBC.
“This is going to be an all-out war inside the ring, Leytehanons will see a lot of knockouts and submissions in this fight card,” matud pa ni Yaw-Yan Cebu CEO and Founder Master Benigno 'Ekin' Caniga. (BANAT PALARO)
- Latest
