CEBU, Philippines – Ilusad na karong adlawa ang ikalimang libro sa eskrima ni Filipino Martial Arts Grandmaster Ciriaco ‘Cacoy’ Cañete nga giulohan og “The Art of Olisi-Baraw.”
Ang book launching himuon karong alas-11 sa buntag didto sa The Golden Prince Hotel and Suites sa dalan Acacia, eskina Archbishop Reyes Avenue, ning dakbayan.
Ang maong libro nga adunay kapin sa 800 ka pahina nga naghulagway kun unsay mga pamaagi sa pagdisarma o pagbawi (ilog) sa olisi ug baraw, gipasabot sa maong libro aron daling makakat-on ang mga eskrima afficionados.
Matud pa nga ang “Olisi-Baraw” maoy tradisyon nga sistema sa eskrima nga naggamit og olisi (rattan stick) isip unang hinagiban ug baraw (knife o dagger) nga ikaduhang hinagiban.
Ang 95-anyos nga si SGM Cañete gihimong lifetime president sa Cacoy Doce Pares World Eskrima Federation. (BANAT NEWS)