CEBU, Philippines – Suwayan ni undefeated ALA Boxer Melvin 'Top Gun' Gumban (18-0, 9KOs) nga masakmit ang bakanteng Philippine super flyweight title sa away niya batok ni Weljan Ugbaniel (13-2, 4KOs) sa Enero 18 dungan sa Sinulog Festival didto sa Gaisano Countrymall carpark.
Ang taga-Escalante City nga si Gumban, lab-as pa sa iyang first round KO nga kadaugan batok ni Roger Echavez niadtong Oktubre 18 didto sa Bacolod City.
Sa wala pa kadto, ang 24-anyos nga si Gumban mikolekta og daog batok sa mga veteran boxers sama nila ni Louie Bantigue, Nelson Llanos ug Philip Parcon ug kanhi WBO Asia Pacific bantamweight champion Jason Egera.
Sa supporting main event, ang stablemate ni Gumban nga si Elmo 'Bisdak' Traya (6-1, 5KOs) makigbatok ni Gabby Siempo (5-5, 1 KO) sa Cagayan de Oro City sa ilang eight-round lightweight bout.
Mokompleto sa fight card mao ang sangka nila ni Vicente Casido batok ni John Rey Lorico, Melvin Jerusalem batok Rez Padrogane, Gerald Suico batok Junrex Saldivia, Michael Estrella batok Jonne Burlado, Junder Gregorio batok Jesson Horteza ug Joepher Montano batok Melvin Lagumbay. (BANAT NEWS)