Pagara, Servania mobida sa “Pinoy Pride 29”
CEBU, Philippines – Duha ka world championship prospects sa ALA Boxing Gym ang mag-atubang og lisud nga hagit batok sa tagsa-tagsa nila ka mga Mehikanong kaatbang sa ipahigayong “Pinoy Pride 29: Fist of Fury” unya sa Pebrero 7 didto sa University of Southern Eastern Philippines sa dakbayan sa Davao.
Pulos adunay taas nga ranking sa ilang dibisyon, sila si light welterweight Jason ‘El Nino’ Pagara ug super bantamweight Genesis ‘Azucal’ Servania tinguha nga mohimo og impresibong kadaugan aron mahayagan ang ilang damgo nga moaway alang sa kalibutanong bakus.
Si Pagara (36-2, 24KOs) modepensa sa iyang WBO International belt batok ni Cesar ‘El Dolar’ Chavez (23-7, 11KOs), samtang si Servania (25-0, 11KOs) manalipod usab sa iyang WBO Intercontinental title batok ni Juan Luis ‘Perla Negra’ Hernandez (17-3, 9KOs).
Si ALA Promotions President and CEO Michael Aldeguer nagtuo nga duol na ang kahigayonan sa duha niya ka boksidor nga moaway alang sa world title, apan miangkon usab siya nga nahimutang ang duha sa lisud nga sitwasyon tungod sa kalisud sa ilang mga dibisyon.
Si Pagara mipalandong ubos sa 140 lbs. division diin nagtapok ang mga elite boxers sama nila ni Jessie Vargas, Brandon Rios, Ruslan Provodnikov, Lamont Peterson, Amir Khan, Adrien Broner, Lucas Matthyse ug ang kanhi kontra ni Manny Pacquiao nga si Chris Algieri.
“We all know that Jason is in the toughest division (140 lbs.) that is why we want to test him every time he fights and giving him a Mexican opponent will surely show if he is ready,” matud pa ni Aldeguer.
Sa iyang bahin, si Servania mao nay No.1 ranked sa WBO super bantamweight diin naghari ang mipilde kaniadto ni Nonito Donaire nga si undefeated Cuban Guillermo Rigondeaux.
Matud ni Aldeguer nga hatagan pa og daghang away si Servania sa dili pa kini iparang ni Rigondeaux.
“If the opportunity is there to fight Rigondeaux, then we will grab it but right now we want to give Genesis more exposure abroad especially in the United States.”
Moaway usab sa undercard sa maong blockbuster boxing event ang laing duha ka undefeated ALA boxers nga sila si ‘King’ Arthur Villanueva (26-0, 14KOs) ug Mark ‘Magnifico’ Magsayo. (BANAT NEWS)
- Latest
