Madayon kaha?

Gibaha ko’g pangutana sa akong mga kaila ug higala kun mahinayon na ba gyud ang gikahinaman nga engkuwentro tali nilang Manny Pacquiao ug Floyd Mayweather, Jr.

Usa ra akong tubag nila, kana maoy nindot pustaan. Mahinayon ba o dili ang maong away nga giatngan sa mga boxing fans lukop kalibutan karong tuiga.

Nisulbong ang sulti-sulti kabahin sa maong superbout niadto pang 2009, apan hangtod karon wala pa gihapon kini mahatagi og katumanan. Kini tungod kay ang duha ka kampo dili magkasinabot sa pipila ka mga termino nga buot nilang malatid sa kontrata sama sa drug testing ug ingon man sa pagbinahinay sa makita unya sa away.

Gikan pa sa sinugdanan, gusto ni Mayweather nga mas daku ang iyang mahakot nga kuwarta. Gani hangtod karon miinsister siya og 63-35 split sa pay-per-view revenue.

Daghan pa kaayo og mga yangongo si Mayweather nga makaargabyado ni Pacquiao sa maong kumbati. Gawas sa drug testing ug sa kuwarta, duna pay isyu sa gloves. Tingalig mobungat na pud siya og 10-ounce gloves ang gamiton kun madayon ang away nga klaro kaayong dili pabor sa usa ka power-puncher sama ni Pacquiao.  Ug unsa na lang kaha kun plansado na tanan unya sa kalit moyamar si Mayweather nga sa 154 ka libras nga timbang sila magtige nga lisud na kaayong makab-ot ni Pacquiao.  Sa higayon na lang nga hagiton siya ug agnihon nga harungon si Pacquiao aron mahatagan og katagbawan ang gipangandoy sa mga fans, kanunay siyang mangita og rason o paagi aron lamang madiskaril ang away.

Mao nang daghan ang nakugang sa dihang sa naghinapos nga bahin sa tuig 2014 mismo si Mayweather ang mihagit ni Pacquiao nga magbugno sila sa ibabaw sa ring karong Mayo 2. Sus, kun madayon, way lalis nga mamahimo kining labing unang billion-dollar event sa kasaysayan sa boksing.  Apan daghan ang wala kaayo mitagad ning bag-ong pagpaghot ni Money Floyd. Gani mismo si Pacquiao wala mihatag og gibug-aton sa gipangyawit ni Mayweather.

Una, petsa lang ang iyang gisulti ug wala pay tuig. Ikaduha, lisud maghiusa ang duha ka higanteng network nga naghupot karon sa boksing. Si Mayweather gihigtan sa Showtime, samtang si Pacquiao anaa sa poder sa HBO. Labaw sa tanan, lisud hapsayon ang negosasyon kay si Mayweather, sukad pa sa sinugdanan, gusto nga siya mopasulabi ug modominar kun kuwarta nay hisgutan. Dinhi tagilid si Pacman.

Dili sab ko motuo nga si Mayweather talawan kay ang impresyon sa uban kanunay siyang mokakak kun si Pacquiao nay hisgutan. Kun talawan pa si Mayweather, dili unta siya makigsinukmagay sa pipila ka mga banggiitan ug dekalibreng boksidor sama nilang Oscar de la Hoya, Arturo Gatti, Zab Judah, Ricky Hatton, Miguel Cotto ug Juan Manuel Marquez.

Sama kaninyo, ako sab naghandum nga mamahimong reyalidad ang maong gidamgo nga away natong tanan. Ang mga direksiyon baya adto gyud padung anang puntoha. Si Mayweather ug si Pacquiao wala nagkabata. Padung nag sawop ang tagsa-tagsa nila ka mga karera ug wala na sila’y lain pang lig-on nga makontra. Panahon na gyud nga sila magharong aron pamatud-an kinsay labing banggiitan nga boksingero ning sigloha.

Ang nakaapan kay lisud lang gyud tugkaron ang mentalidad ni Mayweather.  Sa poker pa, usa siya ka master bluffer. Lisud kaayo basahon kun unsay anaa sa sud sa iyang huna-huna. Unsay iyang gisulti karon, lahi na pud ugma. Mao nang hangtod nga wala pay kontrata nga nahan-ay ug hangtod nga wala pa kini pirmahi niya, hanap pas diyes panas nga mahinayon ang maong megafight. Sa pagka karon, kutob lang usa ta sa paghandum ug padayong mag-atang kun unsay sunod mahitabo.

Alang sa inyong mga komentaryo o reaksiyon mahimong mo-email sa [email protected]