Bulls misungag sa Pacers

CEBU, Philippines - Ang Chicago Bulls misungag sa Indiana Pacers aron mokulit sa ilang ikapitong sunod-sunod nga daog sa nagpadayong aksiyon sa National Basketball  Association kagahapon didto sa Bankers Life Fieldhouse sa Indianapolis, Indiana.
Si Jimmy Butler midaro og 27 puntos ug  adunay siyam ka rebounds aron pangulohan ang Bulls pagkulit og 92-90 nga kadaugan.
Mipakita sab og maayong labok si Pau Gasol, kinsa miabuno og 20 puntos ug si Derrick Rose mitampo’g 17 puntos alang sa Bulls, kinsa nagtangag na karon og 22-9 nga baraha.
Si  Chris Copeland mihimo’g 13 sa iyang 17 puntos sa fourth quarter, samtang sila si George Hill ug C.J. Miles miamot og 11 puntos matag usa alang sa 11-21 nga Pacers, kinsa gibiyaan og 21 puntos sa second half.
Ang three-point shot ni Butler sa nahabiling 1:07 sa duwa maoy nagtukmod  sa Bulls aron moiskor og dos puntos nga kadaugan.
Sa laing mga duwa, ang Washington Wizards ug ang Orlando Magic parehong midaog og usa lang ka lugas batok sa tagsa-tagsa nilang kaatbang.
Ang Wizards nakaipsot batok sa Houston  Rockets sa iskor nga 104-103, samtang ang Magic naka-eskapo bitbit ang 102-101 nga kadaugan batok sa Miami Heat.
Silang Bradley Beal ug Paul Pierce maoy nangu sa Wizards sa ilang 33 ug 21 puntos. Ang napildeng Rockets gipangulohan sab ni James Harden, kinsa mikadlit og 33 puntos. Si Corey Brewer miamot og 15 puntos gikan sa bench sa Rockets.
Na-outscored sa Houston ang  Wizards sa second-change points (18-9) ug sa points in the paint (50-34), apan wala sila mangigo sa ilang field shooting.
Didto sa American Airlines Arena sa Miami,  Florida, si Nikola Vucevic mibahog og 26 puntos aron pangulohan ang Magic, samtang si Dwyane Wade maoy nangu sa nabugnaw nga Heat pinaagi sa iyang 25 puntos diin 15 niini iyang nahimo sa fourth quarter.
Midaog sab ang Milwaukee Bucks batok sa Charlotte pinaagi sa overtime sa iskor nga 104-94, samtang midaog sab ang Brooklyn Nets batok sa Sacramento Kings, 107-99 ug ang Los  Angeles Clippers mipilde sa Utah Jazz, 101-97. (BANAT PALARO)