Happy New Year 2015

(Year of the Sheep)

Tungod kay matag Lunes ra man mogawas kining akong lindog, mag-una una lang ko'g ingon sa mga suki sa Banat News ilabi na niadtong tigbasahan sa SPORTSgab "Happy New Year" kaninyong tanan. Hinaut nga kung unsa kamo ka bulahan karong 2014, mas madoble pa unta ang inyong madawat nga grasya karong 2015.

Buntag sayo pa lang kagahapon, ako nang gi-research sa internet kung unsang matanga sa mananap ang simbolo sa 2015 sumala sa Chinese calendar.

Matud pa nga ang tuig 2015 maayo ug naghatag og kabulahanan niadtong mga tawo nga nahimugso ubos sa maong tuig nga giila nga   Year of the Sheep. Ang 2015 maoy inyong maanindot nga tuig!

Saulogon ang Year of the Sheep gikan sa Pebrero 19, 2015 ngadto na sa Pebrero 7, 2016. Ang maong kasaulogan ubos sa elemento nga "wood" kon kahoy. Ayay no? Di ba kaha usa ako sa swerte rong tuiga kay nakadawat man ko'g t-shirt nga pinaskohan nga bulok green ug brown nga mga simbolo sab sa usa ka kahoy. Thanks RQ of TV5 and Engr. Ariel Araw-araw.

Ubos sa impluwensiya sa elementong wood, ang sheep o "karnero" usa kuno ka malipayon, manggihuna-hunaon ug magpakabana sa ubang tawo nga nangandoy o dunay ambisyon.

Usa sab kuno siya ka-manggihatagon, sentimental nga pagkatawo o daling "masilo" ug dunay taas nga moral sa kinabuhi. Dali ra sab kuno kaayo siyang mosalig niadtong mga tawo nga naghatag kaniya'g inspirasyon.

Ang ilang swerteng numero mao ang #8 ug ang swerteng mga bulok naglakip sa red, green ug purple. Ang swerteng buwak mao ang carnation ug primrose. Ang direksyon nga angay nilang tumanon  mao ang South, East ug Southeast.

Sumala pa nga ang tuig  2015 maoy ikawalong mananap o simbolo sa Chinese calendar. Ang no. 8 nagpasabot sab kuno og kalamboan ug kalinaw.

Ang mga tawo nga nahimugso ubos sa Year of the Sheep kadaghan nahisakop sa middle-class family. Bisan pa og dili sakop sa upper-class sa katilingban o society, ang karnero, maantigong mo-adjust kung kauban niya ang mga inilang tawo o mga elites.

Dili siya modaot kun mosaway sa ubang tawo kalabot sa ilang mga kahuyang kun weaknesses ug motabang kutob sa iyang mahimo aron lang magmalipayon ang ubang mga tawo.

Ang karnero usa ka dayag nga "humanitarian" kon maloloy-on nga dili kaayo makigsuod sa laing mga mananap.

Mga maantigo o intelihente ang karnero. Sensitibo sab sila sa mga butang nga may kalabotan ang patigayon o business.  Dili nila planohon ang ugma apan maantigo silang modala kung unsay mahitabo sa ilang kinabuhi, mahimong "good or bad."

Kadaghanan sa mga babaye nga karnero mahiligon sa mga outdoor activities samtang ang mga lalaki adto mopuntariya sa ilang trabaho o negosyo.

Ang mga natawo sa Year of the Sheep sobraan ka mahadlokon, dali ra kaayong mahudlat ug daling kulbaan  tungod kay hapit tanang butang ilang ikaguol. Sobra ra sab sila ka sensitibo, sapoton o maproblema sa kinabuhi. Dili sila open kon "bukas" sa ilang emosyon o pagbati.

Alang kanila, ang pagpuyo nga balanse ang kinabuhi maghatag kanila'g malinawon ug malipayon nga palibot. Dili mga materialistic ang karnero apan mga gastador sila parti sa pagkaon ug sa mga butang mga makahatag kanila'g komportable. Kung masuko ang usa ka karnero, mas palabihon niyang tagoan ang iyang kasuko ug dili makig-estorya sa tawo nga iyang nasuk-an.

Ang karnero mahigala-on ug dili sila gustong pasakitan ang ilang higala. Kasaligan kaayo sila ug maayong motipig og sekreto. Mga relihiyoso sab ang karnero ug makig-away pa gani kung hilabtan ang ilang relihiyon.

Pipila sa mga inilang personalidad nga natawo sa Year of the Sheep mao ang boksidor nga si Muhammad Ali ug ang poet nga si Samuel Langhorne Clemens o mas nailhan sa ngalan nga Mark Twain.

MISCELLANEOUS. I want to salute to all the members of the BOC-CIPU Ballclub for their gift-giving project to the poor and the less-privileged senior citizens from Mabolo. Kudos to you Boodie Monteno and your group as well as to your donors.