SMB nagpaabot sa ilang kontra
CEBU, Philippines – Human sila maoy unang misakmit og luna sa finals sa PBA Philippine Cup, ang San Miguel Beermen nagpaabot na lang karon sa kun kinsa ang mopatigbabaw sa init nga semis series tali sa Alaska Aces ug Rain or Shine Elasto Painters.
Ang San Miguel yanung miharos sa Talk N’ Text Tropang Texters, 4-0, sa semis, samtang ang Alaska naglabaw 3-2 batok sa Rain or Shine human midaog sa Game 5 niadtong Biyernes.
Ang Aces ug Painters magtiwas sa Game 6 sa ilang ‘best-of-seven’ series sa Enero 4 didto sa Mall of Asia Arena.
Si San Miguel coach Leo Austria mitagna nga kun di matapos sa Alaska ang serye sa Game 6, hayan nga ang Rain or Shine ang mudaog sa Game 7.
Samtang nagpaabot, si Austria uban ang coaching staff sa San Miguel maniid sa nahibiling duwa sa Aces ug Painters aron usab maandam sila sa dili pa ang finals.
Si Austria miingon nga anaa sa Alaska ang momentum ug segurado nga maningkamot pagmaayo ang mga batos ni Alex Compton nga makuha na ang nahibiling finals slot, apan dili usab niya balewalaon ang Rain or Shine.
Miingon ang veteran coach nga doblehon sa Painters ilang paningkamot aron matabla ang serye ilabi na nga ang Rain or Shine coach nga si Yeng Guiao may taas nang kasinatian sa maong sitwasyon.
“Rain or Shine’s physicality isn’t working. How can Rain or Shine survive would now depend on the motivation of coach Yeng (Guiao). We all know that coach Yeng is good at that,” matud pa ni Austria sa Philstar.com
Ang Rain or Shine tinguha nga makuha ang ikatulong All-Filipino Cup finals appearance sa ilang franchise. (BANAT NEWS)
- Latest
