Labordo mi-KO ni Tronco sa ala-cobra boxing
CEBU, Philippines - Hinay-hinay nga gipamatud-an ni Juren 'Turbo' Labordo (14-2, 9KOs) nga usa siya sa mga masaarong ALA boxer human sa iyang knockout nga kadaugan batok ni Jaymart 'Astroboy' Tronco (14-7, 10KOs) sa main event sa ALA-Cobra Energy Drink 'Tunay na Lakas Boxing' fight card sa miaging gabii didto sa Molo covered gym sa Brgy. Katilingban sa Iloilo City.
Kini ang ikaduhang impresibong kadaugan ni Labordo human sa iyang third round TKO nga kapildihan batok ni Fernando Ocon niadtong Hulyo 26 didto sa Bohol.
Si Labordo mipakita sa iyang kapaspas ug kusog, apan ning higayona mas inutok na ang iyang away dihang hinay-hinay niya nga gipaluya si Tronco.
Pag-abot sa seventh round, usa ka bangis nga kombinasyon sa ulo ug lawas ang gibuhian ni Labordo nga mipahagsa ni Tronco sa 2:39 sa maong round.
Sa supporting bout, laing ALA Gym fighter nga si Arjan Canillas (9-0, 7KOs) mi-TKO sa third round ni Royroy Sumugat (9-11, 3KOs) aron magpabiling undefeated.
Mokumpleto sa mga midaog mao sila si Geo Santisima, kinsa mikulata ni John Rey Melligen sa first round, Virgel Victor batok Jimboy Rosales pinaagi sa unanimous decision, Gerard Suico mipatumba ni Ronald Ombing sa first round, samtang si Melvin Jerusalem mi-TKO ni Jomar Ceneta. (BANAT NEWS)
- Latest
