CEBU, Philippines – Misakmit sa ikaduha nilang daog ang Caimeto Community Organization (CCO) dihang gipatapsingan nila ang Birhen sa Barangay Youth Organization (BBYO), 53-51 sa midget division sa Inter-Color Lorega Echavez Youth Council (LEYC) Sinulog Cup 2015 basketball tournament didto sa Barangay Lorega gym, ning siyudad.
Ang scoring tandem sa Caimeto nga sila si Alvin Luchavez ug John Olmilla maoy nangulo sa kadaugan nga nagkumboya’g 38 puntos, apan nag-agi pa sila og kulba sa final period sa wala pa nila mapukan ang BBYO.
Tabla ang iskor sa katapusang minuto sa duwa, apan si Luchavez mikompleto sa iyang duha ka free throws sa nahabling otso segundos nga maoy miselyo sa kadaugan.
Si Michael Temblor miani og 21 puntos, apan nakawang ang iyang mga paningkamot kay pakyas siya paggiya sa BBYO ngadto sa kadaugan.
Sa uban pang mga duwa sa midget division, ang Gawad Kalinga Phantom mipilde sa Lorega Proper Youth Organization, 70-60, samtang ang San Roque Youth Organization milubong sa Lower Lomr, 63-49. (BANAT NEWS)