Team Cebu City naka-gold dayon
CEBU, Philippines – Naka-gold dayon ang Team Cebu City (TCC) pagsugod sa ilang kampanya sa 2014 Philippine Youth Games-Batang Pinoy National Finals kagahapon didto
sa Panaad Stadium sa Bacolod City.
Si Yuan Chiongbian mikabkab og bulawan alang sa Sugbo pinaagi sa triathlon event.
Labaw sa tanan, si Chiongbian, uban sa laing pambato sa TCC nga silang Ralph Edward ‘Raffy’ So ug Aaliyah Ricci Mataragnon naapil sab sa national youth team alang sa 2015A human sila malakip sa top five.
Si Chiongbian, kinsa igo lang mipahiluna sa ikatulo sa miaging tuig, namawi pinaagi sa pagdaog og bulawan, ning higayona sa boys division.
Nakompleto ni Chiongbian ang lumba nga adunay 440m swim, 12K bike ug 2.5K run pinaagi sa iyang best time nga 30 minutos ug 46 segundos. Si Bam Manglicmor mitapos sa ikaduhang dapit sa oras nga 31:19, gisundan ni Antonio Alejo nga mioras og 32:21.
Sa pikas bahin, si Nicole Daniel Eijansantos nakadepensa sa iyang korona nga mioras og 33:53. Si Lorraine Justin Plaza midaog sa silver sa oras nga 35:00, samtang si Veronica Lourds Deldio miangkon sa bronze medal sa oras nga 35:15. (BANAT NEWS)
- Latest
