CEBU, Philippines – Bisan pa og 10 nalang kabuok ang players nga nahibilin sa Thailand, napakyas gihapon ang Philippine Azkals pagsakmit sa daog dihang igo lang miresulta sa scoreless draw ang ilang duwa sa semis sa AFC Suzuki Cup niadtong miaging gabii didto sa Rizal Memorial Stadium.
Mao na hinuon kini ang labing nindot nga performance sa Azkals batok sa Thailand nga kanunay na lang mopilde kanila sugod pa niadtong tuig 1971.
Kapila nakakuha og higayun ang Azkals aron makaiskor og goal, apan kanunay kini nga madakpan sa goal keeper sa mga Thai.
Sa taho sa Agence France Presse, ang Azkals sunod makigharung sa Thailand sa Miyerkules didto na usab sa RRajamangala Stadium sa Bangkok.
Ang mudaog sa semis series tali sa duha makigharung sa Vietnam o Malaysia nga nagharung usab sa kaugalingon nilang semifinals series.
Ang Azkals miduwa batok sa Thailand pipila ka oras sa wala pa mitugpa sa Pilipinas ang super typhoon nga Ruby. (BANAT NEWS)