CEBU, Philippines - Walay laing tuyo ang Rain or Shine Elasto Painters kun dili ang pagdaog aron mahingpit ang ilang pagsud sa semifinals sa 2014 PBA Philippine Cup.
Ang Rain or Shine anaa karon sa unang dapit sa standing sa ilang 8-2 win-loss record uban sa San Miguel Beermen, apan delikado sila nga matagak sa No. 3 kun mapilde sila sa ilang duwa batok sa Barangay Ginebra San Miguel karong gabii.
Ang Painters ug Gin Kings maoy magharong sa main game karong adlawa nga sugdan sa alas-5 human sa lahugay tali sa NLEX Road Warriors ug sa natagak na nga Kia Sorento ni Manny Pacquiao sa alas-3 sa hapon.
Ang Painters walay pilde sud na sa pito ka duwa, apan si coach Yeng Guiao dili mokompiyansa ilabi na nga ang labing sikat nga koponan sa liga nga Ginebra ang ilang ikaharong.
Ang Rain or Shine lab-as pa sa ilang sikit nga 98-95 nga kadaugan batok sa Alaska Aces niadtong Biyernes.
Sa ilang bahin, ang Ginebra (6-4) sayod nga maglisud na sila pagsulod sa top four, apan ang kadaugan karon sa Rain or Shine maghatag kanila og momentum paingon sa quarterfinals. (BANAT NEWS)