Mayor Rama mihimo’g kasaysayan, 38 triples
CEBU, Philippines - Mihimo og kasaysayan si Mayor Michael ‘Mike’ L. Rama sa Cebu City Hall Sportsfest 2014 basketball tournament human siya mipasud og 38 ka three-pointers sa kinatibuk-an niyang iskor nga 114 puntos atol sa kadaugan sa Mayor’s Office batok sa DPS, 132-76 niadtong Lunes diha sa Cebu City Sports Institute gym sa Sawang Calero, ning siyudad.
Daw sinukod ang pulso ni Mayor Rama sa maong duwa tungod kay ang tanan niyang iskor naggikan sa three point arc.
Ang 114 puntos ni Mayor Rama mas labaw pa og hapit katunga sa kinatibuk-ang iskor nga nahimo sa DPS.
Onse puntos lang unta ang labaw sa Mayor’s Office paghuman sa first quarter, 35-24, apan si Rama mitusak og 19 ka triples sa second ug third quarters aron hatagan ang Mayor’s Office og 40 puntos nga labaw, 99-55 paingon sa final period.
Grabe sab kaayo ang depensa nga gipakita sa Mayor’s Office ilabi na third period diin ila gilimitahan ang DPS og 10 puntos.
Sa sobrang kainit sa pamulso ni Mayor Rama, iya na nga gisolo ang tanang 57 puntos sa second half.
PUNTOS MATAG USA
MAYOR’S OFFICE (132) – Rama 114, Toring 6, Jueves 5, Molina 2, Aniñon 2.
DPS (76) – Buhay 22, Roquinaza 20, Miñoza 18, Blanza 8, Miñoza 8. (BANAT PALARO)
- Latest
