Bangis nga kadaugan

CEBU, Philippines – Wala niya mahimo ang giatangan sa kadaghanan nga knockout nga kadaugan, apan napakita gihapon ni Filipino ring icon Manny Pacquiao nga mibalik na iyang kabangis sulod sa ring human niya gipatumba og kaunom si American Chris Algieri sa wala pa morehistro og usa ka unanimous decision nga kadaugan kagahapon didto sa Venetian Hotel sa Macau.

Si Pacquiao kinsa milampos pagdepensa sa iyang WBO welterweight title grabeng milabaw sa scorecards sa tulo ka judges 119-103, 119-103 ug 120-102.

Kulata dayun ang nasugatan ni Algieri sa sugud dihang natilawan niya ang unang pagkatumba sa second round nga nasundan og kaduha sa sixth round.

Wala makakita og alibyu si Algieri sa paspas nga kombinasyon ni Pacquiao kinsa mipasulod sa iyang mga kombinasyon gikan sa nagkadaiyang anggulo sa depensa sa American fighter.

Pag-abot sa ninth round, usa ka makabungog nga left straight gikan ni Pacquiao ang mikonekta sa apapangig ni Algieri kinsa nahayang, apan nakabarug gihapon ug mitiwas sa ihap sa referee.

Nausban kini sa 10th round ug gikan didto nagkabuang na og lihay ang Amerikanong boksidor. Nanimaho na untang KO nga kadaugan, apan si Algieri mipakita sa iyang kalig-on ug nagpunay nalang og lihay hangtud nga matapos ang away.

Bisan pa og wala niya ma KO, si Pacquiao kontento ra sa iyang daog tungod kay nasayud siya nga gihatag niya ang tanan aron makuha ang kalampusan.

"I'm satisfied with the result," matud pa ni Pacquiao sa Agence France Presse "I did my best. I was trying for a knockout but he was fast and keeps moving."

Wala na hinuon mangulipas si Algieri og luag niyang gidawat ang iyang kapildehan ngadto sa gihulagway niya nga ‘best in the world’ nga si Pacquiao.

"He's perfected his style," matud pa niya. "He's perfected the art of fighting like Manny Pacquiao. He hurt me once when he buzzed me with a left hook.”

Wala hinuon kalikay si Pacquiao sa subling pangutana kabahin sa dugay nang giduso nga ‘super fight’ tali niya ug ni Floyd Mayweather Jr.

Ang eight-division world champion, nagkatawa ra hinuon nga mitubag nga mipakita sa iyang dakung pag-uyon nga sangkaon ang giilang pound-for-pound king bisan kanus-a ug bisan asa.

“His (Mayweather) going to fight me? His going to fight me, Yes!” segun pa niya. “I really want to fight. The fans deserve it.” (BANAT NEWS)