CEBU, Philippines - Duha ka atleta gikan sa dakbayan sa Lapu-Lapu ang gihatagan og cash incentives ni Mayor Paz Radaza tungod sa ilang daku nga kalampusan sa duha ka nasudnong kompetisyon niadtong Oktubre.
Si Desirey Padilla, 14-anyos ug si Andy Familar, 9-anyos ang gihatagan og pasidungog ni Radaza kagahapon atol sa press conference.
Si Padilla, usa ka third year high school sa Gun-ob National High School midaog og duha ka gold medals kortesiya sa vault gymnastics ug team competition sa 6th Milo Little Olympics National Finals niadtong Oktubre 24-26 didto sa Marikina City.
Samtang si Andy Familar, nidaog og bronze sa vault gymnastics sa Batang Pinoy niadtong Oktubre 27-31.
Ang duha pulos nirepresentar sa Team Visayas. Si Padilla gihatagan og P12,000, samtang si Familar gitunolan og P8,000 bugti sa ilang kadaugan.
Si Radaza nagkanayon nga iyaha kining gibuhat isip ganti sa duha ka mga atleta, kinsa mihatag og dungog sa dakbayan sa Lapu-Lapu. (BANAT NEWS)