Green Archers mituhog sa Cobras

CEBU, Philippines - Gidak-on ug solidong depensa maoy gihimong hinagiban sa De La Salle University (DLSU) Green Archers sa ilang pagpana sa 2014 Cebu Schools Athletic Foundation, Inc. (CESAFI) champion Southwestern University  (SWU) Cobras, 59-54  pagsugod  sa lima ka adlaw nga Philippine Collegiate Champion League (PCCL) Elite Eight Series-Cebu Leg kagabii didto sa Cebu Coliseum.

Mga duwa karon

5:15 pm DLSU vs. UV

7:00 pm SWU vs. USC

Ning pagsuwat, nagsangka ang CESAFI runner-up  University of San Carlos (USC) Warriors ug ang UAAP second placer  Far Eastern University (FEU) Tamaraws.

Milabaw ang Cobras paghuman sa first period, 16-12,  apan dali kining naapas sa Archers  ug mao na ang naglabaw sa halftime, 29-27.

Ang Archers dali kaayong nakainat sa ilang labaw diin miburot kini ngadto sa nuybe puntos, 36-27 human sa basket ni Jeron Teng  sa third period.

Nahiagom og suliran sa opensa ang Cobras tungod  kay gawas nga na-fouled out silang Landry Sanjo ug Bendley Valdor, wala kaayo sila makapuntos. Si Sanjo layo ra kaayo sa iyang gipakita nga duwa sa CESAFI finals ug igo lang mihimo’g usa ka palito, samtang si Valdor miamot og siyete puntos.

Silang Mark Jayven Tallo ug Jasper Parker maoy nangu sa Cobras sa ilang 17 ug 15 puntos matag usa.

Si Teng miposa’g 11 puntos aron pangulohan ang La Salle samtang silang Tomas Torres ug Prince Rivero midugang og nuybe puntos matag usa. Ang kanhi Cobra nga si Ben Mbala mitampo’g otso puntos.

Puntos matag usa

DLSU (59) – Teng 11, Torres 9, Rivero 9, Montalbo 8, Mbala 8, Pacual 6, Bolick 4, Torralba 2, Mustre 2.

SWU (54) – Tallo 17, Parker 15, Valdor 7, Bregondo 6, Goloran 3, Pardo 2, Luz 2, Sanjo 1. (BANAT NEWS)