CEBU, Philippines - Way plano ang Barangay Ginebra San Miguel nga ibigay ang daog sa naglisud nilang sister- team Purefoods Star Hotshots sa ilang sangka karong gabii sa PBA Philippine Cup didto sa Smart Araneta Coliseum.
Ang Ginebra ug Purefoods magharong sa alas-3 sa hapon, sundan sa lahugay tali sa wa pay daog nga Blackwater Elite batok sa GlobalPort Batang Pier.
Maneguro ang Ginebra nga modaog aron makuha ang 4-1 win-loss record nga motukmod kanila sa ikaduhang dapit sa standing sunod sa Alaska Aces (4-0).
Human sa ilang kadaugan batok sa Blackwater sa miaging semana, ang Ginebra gusto mopahimos sa ilang suwerte sa Purefoods kinsa adunay 1-2 record.
Naglisud ang defending champion nga Purefoods tungod sa pagka-injured sa ilang mga key players nga sila si Marc Pingris, James Yap ug Ian Sanggalang.
Sa laing bahin, ang San Miguel Beermen mikulit sa ilang ikaupat nga daog pinaagi sa pagpilde sa NLEX Road Warriors, 79-76 kagahapon didto sa Tubod, Lanao del Norte aron maangkon ang ikaupat nilang kadaugan.
Si Arwind Santos mipakita na sab og maayong labok diin mirehistro siya’g double-double pinaagi sa iyang 12 points ug 11 rebounds alang sa Beermen. (BANAT NEWS)